Gefiller vum Kapitalismus

No enger allgemenger Unnahm, déi vum Charles Darwin ganz kloer ausgeschwat gouf, sinn Gefiller universell an iwwerall gläich bei den Mënschen. Dat kéim dohier, well Gefiller biologesch bestëmmt sinn. A genau esou wei ons Kierpere méi oder wéineger d‘nämmlecht sinn, genau esou wei all d‘Mënsche säit Joerdausenden op di nämmlecht Aart a Weis ootmen a verdauen, genau esou wären also och eis Gefiller säit den Ufäng vum Homo Sapiens di nämmlecht.

Ganz falsch ass dat net. Mä Gefiller sinn net nëmme biologesch Reaktioune vu Kierperen, se sinn beim vergesellschaftlechen Mënsch och an déi verschiddenst historesch a gesellschaftlech Zesummenhäng agebonnen, wou se déi verschiddenst Bedeitungen hunn, di verschiddenst Funktiounen an Wäerter attribuéiert kréien. Aus dem Grond gëtt et och eng Geschicht an eng Soziologie vun de Gefiller, déi net einfach an Biologie opgeléist kënne ginn.

En vun de markantste rezenten historeschen Decouverten an dësem Sënn, ass d‘Funktioun vun de Gefiller am Kontext vum Spéitkapitalismus. Si gouf vun der amerikanescher Soziologin Arlie Hochschild gemaach, bei hire Recherchen iwwer d‘Formatioune vu Stewardessen an Receptionnistinnen. An dëse Beruffer geet et nämlech net nëmmen ëm Déngschtleeschtungen, mä virun allem och ëm déi Gefiller déi bei dësen Déngschtleeschtunge solle vermëttelt ginn.

D‘Serie wëll unhand vun zwee representative Beispiller (Aarbecht a Léift, déi zwou Quelle vum Gléck, nom S. Freud) di aktuell Geschicht a Soziologie vun de Gefiller illustréieren: an der „emotionaler Aarbecht“ op der enger Säit, an an der Léift op der anerer.

Besonnesch d‘Léift schéint jo eppes wéi en leschte Ressort vun der Authentizitéit a vun enger Mënschlechkeet duerzestellen, déi dem allgemenge Maartimperatif échappéiert. Deem ass leider net ganz esou. Och d‘Léift, wéi mär se ons virstellen a erliewen, ass en geschichtleche a gesellschaftlech bestëmmte Phenomen, deen net einfach laanscht d‘Logik vun der Wuer an dem „rationalen Choix“ vum ekonomesche Mënsch kënnt. Déi Ännerungen kann een unhand vum Fonctionnement vum Internet-Dating a vum Maart vun den Dating-Coachen an Consultante illustréieren.

Dëst gëtt och en Ausbléck dorop, wéi d‘Aarbecht an d‘Léift an en neie Gesondheetsbegrëff afléisse, wéi en vum Maart vu de Gefiller bis an eis perséinlechst an authenteschst ‘Ech’ (Ich) eran imposéiert schéngt.

1. Gefiller: tëscht Biologie a Geschicht (09/01/2021)

  • Dem Darwin seng Gefiller
  • De Sënn vun de Gefiller
  • Eng kuerz Geschicht vun de Gefiller

2. Gefiller op der Aarbecht, Gefiller als Aarbecht (16/01/2021)

  • De Marxistesche Begrëff vun der Aarbechtskraaft
  • Eng feministesch Kritik um Marx an d‘Wichtegkeet vun de Gefiller
  • Aarbechten mat Gefiller
  • Gefiller als Aarbecht

3. D‘Psychologie vun der emotionaler Aarbecht (23/01/2021)

  • Begrëff a Praxis vun der emotionaler Aarbecht
  • Psychesch Konsequenzen a Niewewierkunge vun der emotionaler Aarbecht
  • Allgemeng Ännerunge vum der Aarbecht am emotionale Kapitalismus („Aarbecht soll Spaass maachen“)

4. Emotionalen Selbstmanagement (30/01/2021)

  • Firmekapitalismus, Réseauën an di nei sozial & psychologesch Kompetenzen ➝ Manipulatioun
  • Den kapitalisteschen Interesse u Gefiller
  • Verallgemengerung vun der emotionaler Aarbecht
  • Vum strukturellen Problem zur individueller Responsabilitéit

5. D‘Léift als Utopie vun Authentizitéit a perséinlechem Gléck (06/02/2021)

  • Abildungskraaft an Maart
  • Eng kuerz Geschicht vun der moderner Léift
  • De Modell vun der romantescher Léift
  • D’Léift am Kapitalismus

6. De Management vun der Léift (13/02/2021)

  • Vum Management zur Psychologie vun der Léift
  • Léift zur Zäit vum Internetdating
  • Léift als Wuer
  • Vum « Klick » zum « Kick »: simmering, ghosting, icing

7. Kapitalistesch Partnerschaften

  • Relationnell Ongewëssheet: Optiounen ophalen
  • Bezéiungen ouni Bindungen
  • D’Narratioun vun der Trennung

8. Léift, Gléck an hir Glécklechkeetsindustrie (27/02/2021)

  • D’Gléck vum Individualismus
  • Huew de selwer gär, dann hunn och di aner dech gär
  • Positiv Psychologie an emotionell Intelligenz
  • Dating Coachen