Wat ass Muecht ?

1. Definitiounen vu Muecht (13 Januar 2015)

Wat “Muecht” ass schéint allgemeng verständlech. Mä bei genauerem Hikucken gesäit en e Phänomen vun enger beandrockender Komplexitéit. Esou gëtt et och eng Wull vu Begrëffer an der Philosophie, der Soziologie an an der Psychologie déi de Phänomen vun der Muecht versichen ze faassen. Ass Muecht eppes wat verschidde Individuen hunn? Oder läit se éischter an der Relatioun tëscht Persounen? Wéi vill Zorten Muecht gëtt et? A léisst sech do e gemeinsamen Nenner fannen?

2. Wat ass Muecht (27 Januar 2015)

Den einfachsten an allgemengsten Begrëff vun der Muecht ass deen vum Zwang. Muecht huet deen, deen säin eegenen Wellen géint de Wëllen vun aneren duerchsetzen kann. Esou gëtt se och a klasseschen soziologesche Definitiounen bestëmmt. Ëm wéi een Zwang handelt et sech awer dobäi? Ofgesinn vun der trivialer physescher Bedreeung (Gewalt) schéint den Zwang net méi grad esou simpel.

3. Gehorsam (10 Februar 2015)

Zwang provozéiert dräi Aarten vun Reaktioun: Widderstand, Gehorsam an hier verschidden Mëschungen. Déi problemateschst awer och déi politesch interessantest vun dëse Mëschungen ass dee Gehorsam deen do kënnt wou een eigentlech Widderstand erwaarde misst. Wéi kënnt et, dat een “nee” spiert an denkt, awer “jo” mécht? Mat dëser Inversioun funktionéiert Muecht als Zwang. (369 Zeechen)

4. Cadragen (24 Februar 2015)

Nieft dem direkten Ausüben vun der Muecht als Zwang gëtt et och méi subtil, indirekt Aarten vu Muecht. Eng geleefeg Muechttechnik, déi tëscht bewosst an onbewossten Zwang läit, ass den Cadrage oder Agendasetzen. De Risiko vum Widderstand gëtt méi kléng wann déi, di follechen sollen net alles wëssen an net alles gesinn. An dat funktionéiert selbstverständlech am Beschten wou am mannsten opfält.  (398 Zeechen)

5. Staat a Muecht (6 Mäerz 2015)

Doduerch awer datt di verschidde Regierungen sech ëmmer méi resolut vu Consultanten aus der Privatwirtschaft berode loossen, gewënnt dat ekonomescht Feld a massiven Zouwuess u politeschem Kapital.

6. Medien a Muecht (24 Mäerz 2015)

D‘Esthetiséieren vun der Politik heescht, dat Politik vun all rationaler ëffentlecher Diskussioun – wuel gemierkt, Diskussioun mat Argumenter, an net just Debatën a Polemike mat Rhetorik – lassgeléist gëtt a duerch bewosst/onbewosst Reproduktioun ersat gëtt.

7. Muecht a Psychologie (7 Abrëll 2015)

Nom Max Weber senger Definitioun ass Muecht „all Chance, innerhalb vun enger sozialer Bezéiung den eegene Wëllen och géint Widderstriewen duerchzesetzen“.

Aus dëser Definitioun eraus zitt den italienesche Soziolog Gianfranco Poggi, eng amusant Conclusioun a sengem Traité iwwert de Staat : „Op eng schockéierend Manéier proposéieren ech, wéinst der Kraaft vun dëser Definitioun, dat de Raiber, deen d’Leit mat der Bedreeung vu senger Waff forcéiert him hir Proprietéiten ze ginn, als Prototyp vun der politescher Figur erscheinen kann.“